Pa kone si nou kone ki nou’ete.
Nou viv lor later Kreol, koz Kreol
Ek manz Kreol me nou pa axepte
Ki lor later Kreol, nou tou Kreol.
Bann bourrbak yer ti kwar zot Franse pir
Ki viv dan Ti-Lafrans lwen-lwen laba;
Bann bourrbak zordi sir kouma lasir
Ki dilo Ganga sourse dan Vakwa.
Bann sorti Lafrik prefer dekrepi;
Bann sorti Bihar met lenz Larabi;
Bann sorti Bhojpour kwar zot koz Hinndi.
Personn pa’le kwar nou tou nou viktim
Ki’inn forse vinn la pou efas nou dram.
Olie dir mersi, nou nimakarram.

Nou tou nou kouma pie lafours san fler
Ki pa rekonet later nourisier,
Ki prefer avoy so rasinn dan ler
Me ki oblize desann dan later.

Enn zour pa enn zour – sa li enbarab –
Nou pou oblize aret nou palab
E asiz ansam otour mem latab.

28.09.21

DAN PLIS GAGN MWENS

Plis li gagne, plis li rode;
Plen tenk me zame satisfe.
Plis li ena, plis li ole;
So bezwen zame rasazie.
So prop lang li pa konn ekrir
Me li prefer lang etranzer
Ki dapre li boukou pli pir
Malgre lalang pe touy gramer.
Li gagn nisa dan kantite
Ki kapav konte-ramase;
Kalite pa konn tini kont.
Plis li gagne, mwens li ere;
Li pa kapav kominike,
Ni kapav get ler dan so mont.

AR MWENS FER PLIS

Mwens li kone, plis deklare;
Mwens li aprann, plis li kone;
Mwens li tande, plis li koze;
Mwens li konpran, plis li zaze.
Plis pa kone, plis li vantar;
Plis pa kone, plis li razwar;
Plis pa kone, plis li tazar;
Plis pa kone, plis li nanar.
Peyna zwisans dan Almanak
Me dan zestaz karo-fatak;
Peyna nisa dan konesans
Me dan palab ki touy konsians.

Samem kiltir pei Moris:
Dan plis gagn mwens, ar mwens fer plis.

26.09.21