– Later ron, otour soley li tourne!

– Manti sa matlo, servi to lizie;
Get sa sime la, lamer divan twa!
Zot plat kouma farata, do fatra.
Soley lev dan les, bwar dilo dan lwes
Me nou later li bouz fix, e li les
Soley, lalinn ek zetwal admir li.
Napa les fatra kouyonn to lespri.

– Ras imen ti ne dan savann Lafrik!

– Aret to kouyonad! To fer mwa sik!
Nene plat, gro lalev, seve krepi
Sa pa nou sa! Al relir liv sakre!
Bondie dan zarden kre limanite
Lapo kler, seve blon ek lizie ble.

Bril tou to bann liv! Aret fer erer!
Satan finn avoy Kopernik, Kepler
Pou detrir travay Bondie Kreater.

29.09.21
 

Nou ti zwe ansam, lontan:
Gouli-dannta, boul-sifon,
Lamok delivre, kanet,
Sapsiway ek kouk-kasiet.
Sakenn so sakenn aster
Lor portab zwe mem zafer;
Klik SMS silansie
Dan ortograf deregle.

Dan natak ek sinema
Nou ti pe partaz riye
Ek plore san tralala.
Aster tousel nou goute
Lor lekran tou kalite
Kari poul san masala.

Pir! Ansam viv separe:
Ansam pou lizie dimoun
Me sakenn dan so kote.
Separe-ansam fer kloun,
Fer vadire pa normal
Anverite pli normal
Ki normal. Viv hawann koun!

29.09.21