Enn fwa dan enn pei, ti ena
Enn ti lil omilie gran dilo.
Lor ti lil ti ena enn zwazo
Ki ti ponn so dizef lor later
San traka, ni okenn lafreyer
Parski pa ti ena ni lera,
Ni bebet pou menas nou dodo.

Rann nou nou ebenn ek nou mangliye.

Enn fwa dan enn pei, enn bourik
Debarke ar so gran konpayon,
Onorab Chouchoundarr Sanfason,
Parazit san limit, san etik.
Li koumans devore, enn par enn,
Tou dizef dodo ponn lor laplenn
Ziska disparision-extenksion.

Rann nou nou ebenn ek nou mangliye.

Enn fwa dan enn pei, bann bourrbak
Par santenn koumans koup pie ebenn,
Fer lafore vinn enn gran laplenn
Pou kapav plant pie kann, fer larak.
Lafore mangliye perdi baz
Pou ranz zoli laplaz pou bronzaz
Bann kliyan dideor depasaz.

Rann nou nou ebenn ek nou mangliye.

13.10.21
 

Lor later Kreol, Losean Endien,
Mama Later ti nouri so zanfan
Ar fri ki sorti depi so pwatrinn,
Plen ar lenerzi, plen ar vitaminn.
Ki li dan karo, ki li dan zarden
Pa zis ti ena lay, zoyon, diten
Me osi arouy, batat, friyapen,
Maniok, may ek zak. Samem nou dipen!

Enn zour deside tou bizen sanze
Parski Gran Bourzwa lot kote dilo
Bien bizen disik pou bwar so dite,
Pou sikre jam ek prepar so siro.
Ki li dan karo, ki li dan zarden
Pa zis ti ena lay, zoyon, diten
Me osi arouy, batat, friyapen,
Maniok, may ek zak. Samem nou dipen!

Kouma Jounid dir, karo-kann partou
Lor ledo Bertlo, lor tou nou ledo.
Klima pe gagn kriz! Kot nou pou bago?
Dife dan Langka! Disik pa dan gou!
Ki li dan karo, ki li dan zarden
Pa zis ti ena lay, zoyon, diten
Me osi arouy, batat, friyapen,
Maniok, may ek zak. Samem nou dipen!

Aster ki pou fer? Replant nou zarden
Ar arouy, batat, maniok, friyapen?
Eski pa tro tar? Bann zanfan pe fen.
Zot pe rod dipen! Zot pe rod dipen!
Ki li dan karo, ki li dan zarden
Pa zis ti ena lay, zoyon, diten
Me osi arouy, batat, friyapen,
Maniok, may ek zak. Samem nou dipen!

12.10.21