Kovid finn montre tou nou bann febles:
Ki li saniter ou ekonomik,
Ki li politik ou ekolozik.
“Pa mwa sa, li sa” ki ti toultan la,
Enn sel kou finn vinn enn siper manntra
Ki donn nou tou drwa deklar nou sazes,
Akiz ek kondann ‘li’, ‘zot’ ek ‘bannla’,
Efas ‘mo’ ek ‘nou’ dan zizman bann kees.

Lezel avion finn regagn so plimaz;
Lotel pe revann so bake gonaz;
Tou bann slogan yer, ar so fos sourir,
Pe dezabiye pou fer touris zwir.
Kas pe revini! Bliye lepase!
Tourism kiltir ver? Aret radote!

11.10.21

Mezon-edision, Boukie Banane,
Ti vinn neseser pou reponn prezan
Kan enn nouvo souf dan lang innyore
Nasion Morisien ti pe pran lelan.
Dan so koumansman, li ti pe servi
Tayprayter, stennsil ek diplikater
Pou enn ti piblik ki ti pe anvi
Bwar literatir dan lang popiler.

Sa lantrepriz la finn res familial
Ek artizanal depi inisial
Ena senkant an, ziska azordi.
Teknolozi finn permet li tini
– lekritir ek lenprimri dizital –
Malgre prezize ki pe rod touy li.

10.10.21