Kovid pe dir nou viv enn lot manier;
Aret pran Bondie pou zero depo
Ek lanatir pou lamone kontan.
Nou tou bizen fer kouma bann lontan
Ki pa ti gaspiy later ek dilo,
De kado Bondie pou viv dan boner.

Me malsans pou nou, laplipar dimoun
Prefer vertiz dan so gran karousel
Ki tourn, tourn, tourn, tourn kouma enn toupi
Akout fwet lor nay dan zwisans zordi.
Dan kraz enn montagn ena gro profi,
Dan fouy bann tinel pou tir lenerzi
Ki lerla servi pou roul karousel
Ena bel maja pou detrwa dimoun.

Roulman enfernal karousel biznes
Fer nou voltize, anpes nou trouv kler
E lerla zwisans trouv leternite
Dan fraksion segonn enn kout desarze.

Kan nou tourn anron, nou trouv mem zafer
E sa anpes nou konpran nou enn fes.

15.10.21

                                      KI ETE SA?
Lamour li enn santiman konplike
Malgre ki so kontrer li mari kler:
Lamour-pasion li dife volkanik
Ki brile ar dezir ler rod plezir
E ki souvan lor vites vinn lasann;
Lamour-reprodixion, nisa fizion
Donn jos responsab pou ranz enn fami
E ki parfwa lantman vinn kreasion.

Lamour li osi Lespri Kreater
Ki fer pasion rim ar reprodixion;
Ki dir So zanfan okip kreasion
Pou garanti fitir nou liniver;
Ki konsey balans ant konsomasion,
Protexion, destrixion ek konstrixion.

14.10.21

                                      PLI GRAN PROFESER
Enn bon profeser zame li montre
Nouvo size kan zanfan pa pare;
Kan so ler vini, lerla li montre
Seki zanfan la pare pou kone.

Depi koumansman Lespri finn servi
Sa metod la pou asir nou sirvi.
Zame galoupe avan konn marse
Si to pa ole tonbe, kraz nene.
Bhagavad-Gita premie ti dir nou
Bizen de kontrer pou nou konpran tou;
Ansien Testaman, Nouvo Testaman
Koz lamour-pardon avan ki Koran
Vinn koz lor solidarite-partaz.
Gran Profeser finn konn doz so mesaz.

14.10.21