Bhagavad-Gita so mesaz bien kler:
Nanye pa ekzis san so prop kontrer.
Savedir nanye pa konpletman bon;
Mem seki move ena so doz bon.

Panndit innyoran souvan rod fer kwar
Enn zour Lalimier pou touy Marenwar.
Vizion Manike ferm li dan brouyar.
Swa li nwar, swa blan; swa li blan, swa nwar.

Gita montre nou nam kontradiksion:
Ler lavi paret, lamor ‘si paret;
Si fas disparet, pil ‘si disparet;
Lamor innaksion se lamor aksion.

Si ou enn Endou ou pa kapav kwar
Dan Manikeism ki pou tengn ou far.

16.10.21
 

Enn fwa dan enn pei, lot kote
Larivier Samarel kot montagn
Ba lesiel, ti’ena enn ti tribi
Saser-agrikilter ar lespri
Lakanpagn ki konn pran ek done
E pa nek ranpli pos, mars ar dagn.

Sak fwa ki koup enn pie, replant de;
Sak fwa ki manz enn mang, plant loyo;
Ar fimie zot nouri zot karo;
Zot ti viv enn lavi balanse.

Zot aryertizanfan zordi-zour
Nek konn pran; dan done zot gagn kriz.
Lanatir finn vinn enn marsandiz.
Akoz sa zarden finn vinn enn four.

15.10.21