Mo enn Endou ki admir Pap Franswa ki mo konsidere kouma enn ‘avtarra’. Pap Franswa pe dimann Legliz prepar Sinod 2023. Parski pozision Legliz Katolik lor sex li bien sokan, mo ti pou ere si lotorite Legliz amenn enn reflexion lor sa isyou la.
Namaste Fraternel,
Dev Virahsawmy
19.10.21

               KAN SEX TI PESE?

Ena relizion senk mil banane
Ki konsider sex kouma expresion
Siprem kreasion san okenn fosont
Ousa derapaz. O Khajurao!
Kan divinite li mal ek femel;
Kan sak Shaktimann ena so Shakti;
Kan Durga ek Shiv ansam zot fer ENN
Zis lespri malad trouv pese dan sex.

Ena relizion, ki fek mont lor tronn,
Ki rod fer nou kwar ki fam bizen res
Anba pouvwar zom parski sex femel
San lord maskilen fer boukou vilen.
Kan divinite li mal ek femel;
Kan sak Shaktimann ena so Shakti;
Kan Durga ek Shiv ansam zot fer ENN
Zis lespri malad trouv pese dan sex.

Enn sans nou ena Swami Pap Franswa
Ki ena kouraz denons ipokrit,
Ki pe sey koriz erer lepase
Ki rod fer nou kwar sex bien malelve.
Kan divinite li mal ek femel;
Kan sak Shaktimann ena so Shakti;
Kan Durga ek Shiv ansam zot fer ENN
Zis lespri malad trouv pese dan sex.

19.10.21

             KIFER KOZ MANTI?

Yer zot ti dir nou Zezi ti res prop,
Se Marimadlenn ki ti enn malprop;
Zozef ti res prop, pa ti les madam
Amenn polision dan zot relasion.
Ti servi soutann pou kasiet pilsion;
Met kouronn raket lor latet pasion.
Me miray mansonz zordi pe grene;
Li nepli kapav touf santiman vre.

Fer sanblan pa finn fouti touf LAMOUR!
Represion pa finn fouti touy LAMOUR
Ki zordi dimann so drwa ekziste.
Nepli pe kapav kasiet seki vre,
Fer paret kasiet seki nou ete:
Zanfan Bondie ki bizen liberte.

19.10.21

Paran pe refiz konn laverite:
Imigran vant vid kras lor so mama
Parski li prefer rasinn enkoni
Lot kote dilo – fos idantite.
Li pa’le zanfan koz prop so prop lang;
Manz prop nouritir sort dan so later.
Seki dideor, sa ki’ena valer.
Ki bizen fer pou ouver lizie tang?

Profeser refiz rekonet esek:
Si zanfan konn lir, ekrir ek konte
Kont lafendimwa pa pou balanse.
Akoz ‘no’ leson, dalo pou koul sek.
Li pa’le zanfan koz prop so prop lang;
Manz prop nouritir sort dan so later.
Seki dideor, sa ki’ena valer.
Ki bizen fer pou ouver lizie tang?

Pret, imam, panndit, pousari, oja
Ki nek resite kouma peroke
Pa’le perdi fas si zanfan kone
Tou sekre Bondie ki dan liv sakre.
Li pa’le zanfan koz prop so prop lang;
Manz prop nouritir sort dan so later.
Seki dideor, sa ki’ena valer.
Ki bizen fer pou ouver lizie tang?

Politisien pa ole elekter
Ki kapav lir bien bann nom lor bilten.
Bez dan douniya! Tou bann pie banann
Pou perdi kosion dan sak eleksion.
Li pa’le zanfan koz prop so prop lang;
Manz prop nouritir sort dan so later.
Seki dideor, sa ki’ena valer.
Ki bizen fer pou ouver lizie tang?

17.10.21