Enn fwa dan enn pei, lot kote
Larivier Samarel kot montagn
Ba lesiel, ti’ena enn ti tribi
Saser-agrikilter ar lespri
Lakanpagn ki konn pran ek done
E pa nek ranpli pos, mars ar dagn.
Sak fwa ki koup enn pie, replant de;
Sak fwa ki manz enn mang, plant loyo;
Ar fimie zot nouri zot karo;
Zot ti viv enn lavi balanse.
Zot aryertizanfan zordi-zour
Nek konn pran; dan done zot gagn kriz.
Lanatir finn vinn enn marsandiz.
Akoz sa zarden finn vinn enn four.
15.10.21