©DEV VIRAHSAWMY AND ICJM

(KAN KOZE POU LABOUS PA PI)

1. Aret fer to senn!
Katrovendiznef pou enn,
Leres gagn zis enn.

2.Lor later frengan
Olie nouri nou zanfan,
Nou ranz nik larzan.

3. Lalwa finn large
Lasenn dan lame-lipie
Me pa dan panse.

4. Grolizie Tivant
Toultan gore, pa envant.
Ar gonaz plen tant.

5. To kwar to’enn gro kous!
Kifer to bous to labous
E servi to pous?

6. To viv dan dilo
Me dan naze to’enn lalo
Net anbalao.

7. To kamwad anba.
Olie efas so traka
To nek zis pans twa.

8. Pou enn gous zwisans
Kot nwizans nouri vanzans
To’nn touy lesperans.

9. Manti! Pa manti!
Lagli, gabzi pe nouri
Profi tilespri.

10. Roupi bous lespri,
Parfim kadav santi pi,
Pentir verdigri.

23.06.2017

DEV VIRAHSAWMY AND ICJM

He zanfan,
Zot finn bliye swasant zero?
Zot finn bliye ki ti’arive?
Ala zot re-sote-pile
Pou selebre nouvo ero!

He zanfan,
Pa les viris Makronfilis
Paraliz zot lafors-lespri!
Pa les ennmi chori-chori
Sem lapipi Dolarfilis!

He zanfan,
Tipti tas rouz lor flanbwayan
Zot pa anons nouvo lane!
Pa les sanblan anbet lizie,
Kouyonn lespri nou bann zanfan!

He zanfan,
Makronfilis pou moraliz
Lavi piblik? Zoli blabla!
Finans pe touy nou douniya!
Dir li moraliz so prop miz!

He zanfan,
Lepep Franse finn santi lay:
Loulou finn met kostim mouton;
Servi losion pou santi bon.

To pa pou sape, vielle canaille!

19.06.2017