©DEV VIRAHSAWMY AND ICJM

Zenes,
Pa les mardayer-triyanger;
Pa les manter, taker, violer;
Pa les voler, paser-diber
Kriye for “Stop thief, au voleur”
Pou sem konfizion,
Detourn latansion,
Anpes twa trouv vre vizaz kouyoner,
Triyangaz, trikmandaz LAMONE
Ki yer ti nouri lever Lakavern
Pou detrir Dawoud, Vikram ek Atek.

Zenes,
Pa les disip aparteid
Fer twa bliye soufrans lasid
Ser-frer Lafrik, Pol Nor, Pol Sid.
Pa les zot natak, gamat, sinema
Fer twa vinn dogla, nachannya, soumra,
Chokra, bachara ki nek rod nisa.
LAMONE pe fann lamone
Pou fer Macron ranplas Corbyn,
Pou fer Bourrbak ranplas Navinn,
Pou fer mofinn touy klerdelinn.
Yer zot ti nouri lever Lakavern,
Zordi zot nouri lever Balivern.

12.06.2017

©DEV VIRAHSAWMY AND ICJM

He zanfan, zot rapel “Animal Farm”?
Dan nou lang “Baz Zanimo” ena sarm.
He zanfan zot rapel koson Squealer,
Oustad propagann, exper dan fer ler?
Dan nou lang, nou apel li Bay Tronpet,
Bater-bis, bater-tanbour, gardien fwet.

He zanfan, zot pa pou kwar ki isi,
Dan nou pei mirak manti-manti,
Realite li finn depas fixion:
Koson Squealer finn desid pran leson
Ar gran bater-bis, gran bater-tanbour
Lor seo baydoum par deryer lakour.

Koson Squealer pe aprann toulezour
Fer manti vinn vre, fer tou ‘kont’ vinn ‘pour’,
Pianter santi bon, ‘zame’ vinn ‘touzour’.
Lenvanter finn vinn vizion bidzeter;
Karne laboutik vinn ekonomik;
Deksi briyani vinn filozofi.

Mo gourrou dir mwa ler finn arive
Pou met Bay Tronpet dan godam mize.

11.06.2017