©DEV VIRAHSAWMY AND ICJM

Tex sours: 60 Love Prayers from Rumi – Devon Holcombe – Kindle Edition.

1
O Bondie adore
Gid mwa pou sorti
Dan tourdisman traka
Montre mwa kouma tengn tapaz dan leker
Ed mwa rant dousma
Dousma
Dousma
Dan bann serk ki grandi toultan
Dan nwayo Lekzistans.

2
Kan mo lespri dir mwa
Sime bloke divan
Senier Adore
Fer Lamour mirmir dan mo zorey
“Ekout mwa, ena sime!
Mo finn swiv sa larout la
Boukou-boukou fwa.”
Kan mo lespri dir mwa,
“Tansion danze divan.
Pou ena boukou soufrans
Si to perdi tou,”
Les mo tann riye Lamour,
Ler Lamour pe dir,
“Soufrans li zis dan to lespri.”
Montre mwa kouma trouv fler roz
Dan leker mo douler
Pou ki amizir mo avanse
Mo nam dekouver
Enn filwar
Zarden fler roz.

3
O Zezi, fer mo feray
Vinn lor,
Fer lor ki deza
Dan mo leker
Vinn perl.
Si dan fon mo leker
To trouv enn malere perl
Fer li vinn pli zoli
Ki lalinn.

4
Bondie,
Kan mo poz kestion
Lor to Lamour
Fer mwa rapel dan ki trou
Dan mo leker
Kestion la sorti

5
Mo pe vann mo lespri
Ek mo talan
Dan lavant, O Lamour Adore.
Ar kas la
Mo pou aste
Emerveyman.

6
Bienneme Bondie,
Aster mo konpran:
Kan mo kriye,
“Pli divan, pli divan
Mo pou rant dan bit!”
Mo’nn bliye
Bizen viv dan “aster ek isi.”
Mo pe viv dan rev dime
Kan mo pe rat zordi.
Kan vire-tourne,
Rod sikse dan dime,
Mo rat sime
Mo prop Momem.

7
Ou asir mwa,
Bondie Adore,
Ki ou la ar mwa,
Dan profon mo nam.
Malgre sa, gagn konpran
Koste dousma-dousma, bout par bout,
Zame direk.
Kan lalimier anfen alime,
Mo pou dir, “Ala to la
Kot to finn touzour ete,
Dan sant mo leker!
Vremem mo kaylous!”
Me si mo ti konsian ki to ti la,
Dan sant mo nam,
Mo pa ti pou fer zefor to trouv twa.
Mo long vwayaz se sel sime
Pou dekouver
To prezans.

8
Boutey liker to lagras
Zame vid.
Si mo pa ena ase
Problem li ar mo ver.
To kouma ekleraz lalinn
Ki plen lesiel net.
Kantite lekleraz lalinn
Ki rant dan mo lasam
Depann lor grander
Mo lafnet.

9
Si mo lavi li enn koup
Ranpli ar to liker, O Lamour,
Mo bizen rapel tret koup la ar respe.
Si Lamour finn deside
Mwa ki si poban,
Falepa mo bliye
Mo dinite reel.

10
Mo devwar, Bondie,
Se met mo latet
Lor biyo
Lavi.
Ala kifer
To bizen donn mwa
Enn nouvo latet
Sak fwa.

Continue reading “LAPRIYER ROUMI, GRAN POET SOUFI”

©DEV VIRAHSAWMY AND ICJM

SOURS: http://www.worldhealingprayers.com/5.html

EARTH PRAYER 1 / LAPRIYER POU NOU PLANET 1

We gently caress you, the Earth, our planet and our home.
Our vision has brought us closer to you, making us aware of the harm we have done to the life-network upon which we ourselves depend.
We are reminded that we have poisoned your waters, your lands, your air.
We have filled you with the bones of our dead from war and greed.
Your pain is our pain.
Touching you gently, we pray that we may become peace-bringers and life-bringers so that our home in its journey around the Sun not become a sterile and lonely place.
May this prayer and its power last forever.

Ar tandres nou okip twa Gaia-Mata, nou planet, nou lakaz.
Nou sazes pe fer nou realize ditor ki nou finn fer twa ek lasenn lavi. Pourtan nou bizen sa pou nou viv.
Aster nou konpran ki nou finn anpwazonn dilo, later ek ler.
Nou finn ranpli to lekor ar lezo kadav, viktim lager ek gourmandiz.
To soufrans li nou soufrans.
Permet nou tous twa ar tandres. Nou dimann Bondie ed nou pou vinn militan lape ek protekter lavi pou ki nou lakaz ki tourn otour soley pa vinn enn planet steril san lavi.
Bondie, pa les nou lapriyer perdi so lafors e tom dan vid.

Continue reading “ANOU TOU PRIYE ANSAM”