Ar zot laswer zot swagn later,
Fer karokann donn bon rannman.
Malgre tapaz roderdeler
Zot finn nouri nou devlopman.
Me pa bliye deryer sikse
Ti’ena madam ki debrouye:
Okip lakaz ek zanimo,
Okip lakour, okip karo.

Ler nou fet nou lendepandans,
Ekout diskour, sawal ravann,
Pa bliye nou rekonesans
Pou bann solda dan karokann.
Pa bliye sirtou bann madam
Ki tini lesiel san tamtam;
Donn nou dile limanite
Pou viv lavi dan dinite.

1
Laserp fite dan zot lame,
Zot rod chombo zot destine.
Zot finn fer karo kann fleri;
Dan karo kann trezor sorti.
Lwen-lwen laba bann gro kargo,
Zot vant ranpli ar nou disik,
Pe fouy lamer pou al Lerop.
Lwen-lwen laba, how do you do,
Disik Moris li bien-bien dou.
2
Me zordi nepli kouma yer!
Nou zarden finn vinn simitier.
Bernar, Annliz ek tou ser-frer
Bizen refer later, lamer.
Lwen-lwen laba, how do you do,
Disik Moris lontan ti dou;
Aster li gagn ti gou amer.
Pre-pre isi, bann travayer
Pe konstrir nouvo liniver.
3
Fer karo kann donn nou kouran,
Anpes detrir lanvironnman;
Servi zi kann pou fer liker,
Liker kalite lor kouler.
Pre-pre isi, Bernar, Annliz
Ek tou ser-frer, ek tou bann miz
Pe trap lame, marye pike.
Pre-pre isi, zanfan Moris
Ar gouli kann pe fer delis.

D.V