DEV VIRAHSAWMY
5, Edwin Ythier Street, Rose Hill, 71368, Mauritius
limemsa@gmail.com     https://boukiebanane.com

ENN TI LAPRIYER POU DIR MERSI

(TO SAY THANK YOU)

Saraswati, Shakti Bramma,
Pe dir mwa kontinie sante:
Pa per pou sant “Disik Sale”,
“Trip Sere Lagorz Amare”.
Vishnou ole mo kontinie
Fer lang Moris vinn literer.
Pitie Shiva! Mo fatige!
Douler pe dir mwa, “Mwa ki la!”

Trimourti ek zot trwa Shakti
Finn donn mwa lamour, lamitie,
Boner, lape, sekirite;
Mo finn konn enn lavi ere,
Antoure ar vre afeksion
Me ‘sendrom-pos-polio’ zordi
Obliz mwa dimann Lord Shiva
Ramas mwa e permet mo nam
Al dan lekor plis meritan.

Trimourti, Tridevi, Zezi
Pardonn febles laz-maladi!

24.03.23

Brahma’s Shakti, Saraswati,
Wants me to keep on singing
“Bitter Sugar”, “Cramped Guts, Gasping Throat”.
Vishnu wants me to keep on writing
Literary Mauritian.
Help me Lord Shiva!
I’m weak and tired!

Trimurti and their Shakti
Have given me love, friendship,
Happiness, peace, security.
I have known joy
And genuine affection
But P.P.S compels me
To ask Lord Shiva
To help my soul find
A more deserving body.

Trimurti, Tridevi and Jesus
Please forgive an ailing body.

25.03.23

DEV VIRAHSAWMY

2-3 GAZAL/ SOME GHAZALS

01: POU TWA, POU MWA, POU NOU

Ze-me-mwa, I-me-mine, mo-mwa
Samem pwazon nou douniya.
Poumwa-poutwa egal pounou
Limem lakle trezor karrma.
Kan dan done ena gagne
Nou lekzistans dir “Mwa ki la!”
Kan biennet lotla enportan
Nou aret fer nou sinema.
Kan kreasion donn devlopman
Pa enn me tou, vre tamasa!
Zezi ti vinn dir nou tousa
Me nou prefer enn lot lavwa.

(when I-me-mine is king
something important is missing
the key to happiness is sharing
but we prefer not to remember
what Jesus told us)

02: POU DIR MERSI

Saraswati finn tranp mo plim
Dan enn polank kouler siblim;
Vishnou finn ranz fraz Morisien
Ar douser lekleraz lalinn;
Trimourti, Tridevi, Zezi
Finn aroz lavi ar sennbim;
Mo finn konn lamour, lamitie,
Boner, sekirite, lestim …
Mem si vieyes ek maladi
Bes mo bobes, li pou enn krim
Bliye mo devwar lezitim
Desinn sourir mem enpe dim.

(I have been given so much
that I am duty-bound
to give back as much
if not more
thank you my good Lord)

03: GET ENVIZIB

Mo seve Malbar, to seve pikpik;
To seve lalwes, mo seve Lafrik.
Mo vwazen pe dir pa kapav kontan
Parski gat nasion pe fer malefik.
Tou seki fizik pronons diferans;
Resanblans kasiet dan metafizik.
Les zot palabre, zot kontan zaze!
Ti pikir moustik pa pou touy mistik.
Mo lamour pou twa, to lamour pou mwa
Samem gran kado nou Senier Mazik.
Vishnou vinn Zezi, Zezi vinn Vishnou
Pou fer liniver vinn plis manifik.

(because we are different
they say it cannot be love
what is visible conceals
what, in fact, is most alike
Vishnu-Jesus taught us this
but we do not remember)

04. ZOT ENA MEM SEX ME …

Zot ena mem sex me zot’le marye;
Komeraz zaze, dir zot pe fane.
Maryaz oblize donn nesans zanfan;
Pa koz adopte! Zame ti konte!
Dan zarden-Dedenn finn fer nou konpran
Sa pa lamour sa! Sa se pitasie!
Me zot pe prefer lir Kama Soutra
Ki montre sime pratik malelve.
Kan nou Pap Franswa koz zanfan Bondie
Zot fer koumadir zot pa pe tande.
Zot prefer lamour fini simitier
Ki lamour fleri dan enn lot manier.

(just because they are non-binary
gossip thrives
sex must give new life
otherwise it’s a waste
read Genesis,not Kama Sutra
forget Pope Francis
and love which grows differently)

26.03,23