DEV VIRAHSAWMY
5, Edwin Ythier Street, Rose Hill, 71368, Mauritius
limemsa@gmail.com https://boukiebanane.com

PA MELANZ KALCHOUL!

Ayo mo matlo! Pa melanz kalchoul.
Pa kapav servi enn kouyer diri
Pou melanz kari. Pourtan toulede
Zot apel kouyer. Zot dan mem fami
Me pa mem parey. Get enn grap leksi
Ek enn grap longann, zot pa mem parey
Me zot toulede sort dan mem fami,
Fami Spinndasia (Spindaceae). Pie zak pa parey
Ar pie friyapen me zot toulede
Zanfan mem fami, fami Morasia (Moraceae).

Ayo mo matlo! Pa melanz kalchoul.
KANABIS-NISA, ki donn THC,
Ki dan nou pei nou apel ganja,
Ki dan Larenion zot apel zamal,
Sort dan mem fami ki plant apel ‘HEMP’,
Ki donn CBD, enn dilwil mazik,
Ki ed bann pasian diferan malad
Gagn soulazman kont bann douler atros.
Kapav apel li KANABIS-MEKSINN.

Ayo mo matlo! Pa melanz kalchoul.
Kanabis-nisa ar so THC
Li sikoaktif, plonz nou dan mangann;
Kanabis-meksinn ar so CBD
Ek plizier lezot matier enportan
Donn nou enn platform pou nou devlopman.
Enn frer ek enn ser ditou pa parey
Malgre ki zot de sorti dan mem vant.

PA LES BANN VERMINN VINN BROUY NOU LESPRI!

04.08.23