kan rev finn anvole

ENN TI GRAP AYKOU

[Haiku: ti poem 17 silab dan 3 lalign (5, 7, 5). Lorizinn: Zapon]

Limanite net
Zame ti ne dan zarden
Me dan savann nwar.

Dan pase lwenten
Nou bann anset Afriken
Ti mars bien-bien lwen.

E partou kote
Zot finn ranz nouvo bote
Lor nou planet ble.

Ensten migratwar,
Deplasman popilasion
Dan nou A.D.N.

Melanz kontinie,
Metisaz akselere.
Aret koz pirte!

Bann Aryen lao
Pous bann Dravidien anba
Dan dife Langka.

Venker lager vinn
Bondie, bann panndit dir nou.
Louzer vinn satan.

Pourtan Rawana
Ti enn gran lerwa pwisan,
Gran entelektiel.

Nou tou bien kone
Laviktwar ekrir istwar,
Defet bous lagel.

Kan ou mont lor tronn,
Manti vinn laverite.
Kontan pa kontan!

Lot kote dilo
Enn Palestinien vinn blan,
Blon ar lizie ble.

Avatar Vishnou,
Enn zanfan batar vinn plant
Lamour ek pardon.

Bann manter dir nou
Ki Marie pa ti konn sex.
Eternelman vierz!

Ayo, gran maler!
Mansonz finn rant plen partou!
Kouma pou trouv kler?

Oupanishad dir
Si ou’le konn ou profon,
Ferm robine sans.

Ferm robine sans,
Ki li lizie ou zorey,
Pou ou trouv ou nam.

Laplipar nou kwar
Ki se mirwar ki koz vre.
Nou finn may dan lak.

Nou pa bros ledan
Me penn lalev ar dirouz.
Nou sivilize.

Nou fer labous pwent
Pou nou prononsh mo Franshe.
Gramer pa dan kont.

Pa koz dal ek bred;
Koz gonaz sivilize
Medinndideor.

Pran dipen rasi,
Plonz li dan bouyon besann,
Nway li dan dilwil,

Met so satini,
Rapel so pima konfi.
Sa ki nisa sa!

Diri Basmati
Ek so lafarinn dible.
Sa ki nou bizen.

Pa koz friyapen,
May, maniok, batat, arouy.
Zis bon pou koson!

Nou sivilize.
Sanpion dan jabet, tansion
Ek obezite.

Lil Moris profon
Pa’le aksepte ditou
Vre laverite.

Lor later Kreol
Nou tou ena mem istwar.
Nou tou imigran:

Imigran sorti
Lafrik, Lerop ek Lazi
Pou kre nouvote.

Pou konstrir nouvo
Relasion ar nou vwazen
Ek ar lanatir.

Replant lafore
Bwadebenn ek mangliye
Pou zanfan dime.

Samem nou mision!
Fer ver bourzone partou.
Resofman fonndos!

27.10.22