Category: Teat Orizinal / Original

©DEV VIRAHSAWMY AND ICJM

BANN PERSONAZ DAN LORD KI ZOT PARET
LAFOUL
KER, SANTER EK MIZISIEN
DAMMARRO EK KASPALTO
OTELO
YAGO
DESDEMONA
RODERIGO
EMILIA
TINO
ETRANZE 1,2,3
SEF GABLOU
METR KALIKO, AVOKA
MIRO EK 2 ZANFAN (1 TIFI EK 1 GARSON)

AK 1 SENN 1

Dan enn plas piblik. Dimoun sorti depi diferan klas sosial, diferan group etnik ek kars, diferan okipasion pe monte-desan. Laplipar pe sarye zot sak shoping. Noel ek lane pre. Vitrinn magazen dekore ar sapen ek lanez artifisiel ( zistwar la pas dan enn pei tropikal kot tou bann pie flanbwayan ki dan sertenn rezion dimoun apel boukie banane, finn fini larg zot petal rouz, zonn, oranz laflam ki prezan partou, lor pie kouma dan ler ek lor later ); bann magazen pou zenn pe mete for-for lamizik jalsa; bann magazen delix pe zoue lamizik dous ek diskre; parsi-parla pe tann lamizik tipik Noel. Dan enn landrwa santral ena bel animasion. Enn group pop pe enstal zot enstriman. Zot larg sawal. Lamizik la obliz bouz leren. Lamizik ek tex bien rebel (enn parodi Jingle Bell ar akonpagnman seggae).

KER
Sonn laklos, sonn laklos
Lekours pe large;
Galoupe tou bann zanfan
Bonom Noel finn pase.

SANTER
Bann bourrkbak galoupe,
Galoup deryer paysa
Me ler zot pre pou rant dan bit
Paysa fer fos ar zot.

KER
Sonn laklos, sonn laklos
Lekours pe large;
Galoupe tou bann zanfan
Bonom Noel finn pase.

SANTER
Dominer pous lor pie
Larogans san pitie
E ler zot fer zanfan plore
Zot santi zot mari.

KER
Sonn laklos, sonn laklos
Lekours pe large;
Galoupe tou bann zanfan
Bonom Noel finn pase.

SANTER
Petal roz pe griye,
Oxizenn dan dife
Me mo bankie sak gramaten
Met kadna dan lafwa.

KER
Sonn laklos, sonn laklos
Lekours pe large;
Galoupe tou bann zanfan
Bonom Noel finn pase.

SANTER
Get soley pe leve,
Nouvo zour kas pares.
Ala marday pe fer marday,
Nou ris kales nou’ale.

KER
Sonn laklos, sonn laklos
Lekours pe large;
Galoupe tou bann zanfan
Bonom Noel finn tase.

De klosar, Dammarro ek Kaspalto, lor enn ban piblik. Dan bakgraoun, tamtam Noel pe donn bal.

Continue reading “PREZIDAN OTELO”

©DEV VIRAHSAWMY AND ICJM

BANN PERSONAZ
BRAMINEVA
LAKADEDAM
FAYPAT
KATPAT
TAYKAT
SAM

Lor bistop. Omilie lanwit. Dan selter enn personaz pe asize tousel. Li paret ti kalite, mens; so seve drwat plat lor so latet ek enn bert omilie fini ar de lake par deryer; li met enn kostim zom kouler nwar extra larz ki anpandan lor li kouma lenz enn zean lor enn nen; lamans so palto ploye pou liber so lame; lagoul so pantalon ploye pou ki li kapav marse; so lipie pa vizib. Li apel Bramineva. Li pe asiz lor ban, lipie gos lor lipie drwat; li fixe drwat divan li; … li sanz pozision; li met lipie drwat lor lipie gos; … resanz pozision; … lipie gos lor lipie drwat. Li dibout, mars-marse, al dibout lor ban; fer koumadir li pou dir kiksoz; sanz lide; re-asiz lor ban, ti lipie lor gro lipie. Enn lot personaz rantre. Li enn lom ki paret demi-porsion; so long rob iniversiter trene anba; so kap gradie tini lor so zorey. Li apel Lakadedam. Li al direk dan lot extremite selter la san get Bramineva koumadir li pa ekziste. Li skwat dis fwa; galoup anplas; re-fer skwat; alonz lor ban, fer lekzersis vant.
LAKADEDAM
Mens sana in corpore sano. ( Li roul enn kanon ganja, koumans fime. Li get Bramineva koumadir premie fwa li dekouver so lekzistans.) Enn dam? … Non? … De dam? … Mo prezant momem. Profeser Lakadedam. … Enchanté! … Mademoiselle? … Madame? … Monsieur?
BRAMINEVA
Sovaz! Ou’le enn klak? … Taler mo fer lapolis ramas ou. Ou kwar mo ou zans mwa? Al sikann ou mama! Al sikann ou ser! … (Li tir enn liv dan so pos, li koumans lir.)
LAKADEDAM
Ayozoto! Enn sovsouri. Enn sovsouri!
BRAMINEVA
Kotsa? Kotsa?
LAKADEDAM
La! (Li montre li ar so ledwa.)
BRAMINEVA
Hell is the other people. … Ou rekoumanse?
LAKADEDAM
Rekoumanse? Mo pa ankor arete. Ou pou dir, ou pa pou dir?
BRAMINEVA
Ki pou dir?
LAKADEDAM
Mwa mo Lakadedam, ou ou …. ou ou? Ou ou ou ou? Pa kone!
BRAMINEVA
(Li remet so liv dan so pos, get otour li, mont lor ban, fer koumadir li pe al koze, sanz lide, reasize, tir so liv, ouver li, met lame dan enn pos, tir enn ti tors elektrik, ekler paz so liv, koumans lir.)
LAKADEDAM
(Peyna okenn reaksion koumadir tousa bien normal. Li kontinie fim so mas.)
Ris enn dam? (Silans) … (Li koumans sante.) Dam maro dam, Hare Krishna, hare Ram… (Li sante, danse. Li kler ki li ena boukou stil. Apre enn bout letan, fatige, li dormi lor so ledo lor enn ban, krwaz so lame lor so vant kouma enn kadav, li bouz fix. Bramineva lev so latet pou gete ki pe pase. Li fixe Lakadedam ki pa pe bouze ditou. Li tengn so tors, met so liv dan so pos, al ver Lakadedam, apros ar li dousma-dousma ar boukou ezitasion okoumansman. Li met so zorey bien pre kot so nene pou gete si li pe respire…. Enn kou, san atann, Lakadedam drese, asize. Bramineva galoupe, retourn dan so plas, tir so liv, alim so tors, fer sanblan li pe lir.) Dernie bis pre pou pase ousa finn fini pase? (silans) Dernie bis finn fini pase? Ousa pankor? (silans) Fini? Pa’nkor? Pa’nkor? Fini? Fini? Pa’nkor? Pa’nkor? Fini? Fini? Pa’nkor? Pa’nkor? Fini? Fini? Pa’nkor? Pa’nkor? Fini? Fini? Pa’nkor? Pa’nkor? Fini? Fini? Pa’nkor? Pa’nkor? Fini? (Li koze ar ritm enn lokomotiv ki demare, akselere e finalman ralanti, arete.)
BRAMINEVA
(Lev latet, met so liv dan pos.) Latet pa bon? Depi lepok Walter nepli ena tren. (Li mont lor ban.) … Aster nou vwayaz par bis, taxi, taxi maron, loto joutifri, loto fri net, motosiklet, mobilet, trotinet. Bisiklet, pa koze, … finn rant dan mize tren. Nou ena sime enn vwa, de vwa, trwa vwa, kat vwa. We are civilised. Nou dekouraz dimoun marse ousa pedale. Sa zis barbar ki fer. Nou pou konstrir metro leze, metro lour, pwa plim, pwa kok, pwa poul mouye. We are modern. More modern than that, spoil. Dan nou koze ena vites, dan nou gete ena vites, dan nou panse ena vites, dan nou santi ena vites; ena vites, ena vites, ena vites, ena vites,ena vites, ena vites, ena vites, ena vites, ena vites, ena vites, chaka, chaka, chaka, chaka … chaka, chaka, chaka, chaka … chaka, chaka, chaka, chaka … chaka, chaka … chaka, chaka … chaka … chaka … chaka … cha … chhhhhhhhhhhhhhhhh.
LAKADEDAM
Tren la finn arete?

Continue reading “BISTOP”