MAURITIAN, THE NATIONAL LANGUAGE OF THE MARITIME REPUBLIC OF MAURITIUS; CREATIVE WRITING; TRANSLATION OF LAY AND RELIGIOUS LITERATURE; IMPORTANT ISSUES (global burning, climate crisis, politics, education, nation building etc.) [mersi Google pou zimaz.]
Limazinasion popiler
Rod so boner dan lalign drwat;
Seki pa drwat enn gran maler;
Seki kabose kraz jawat.
Lavi desinn enn lalign drwat
Depi nesans ziska lamor.
Se lamour fos ki kas kontour
E akoz sa ki li faypat.
Dan liniver tou pe tourne:
Lalinn li tourn otour Mata;
Later li tourn otour Sourrya;
Galaksi osi pe tourne.
Lavi-lamor monte-desann;
Dilo fonn, dife vinn lasann.
22.09.21
Nou get esansiel, li bien kontan dir;
Detay bar gete, anpes nou trouv kler.
Si rod lipou poul, zafer la vinn pir;
Olie lalimier, nou trouv tou traver.
Esansiel ouver laport paradi
Tandik ki detay pouri nou lavi;
Esansiel donn nou progre, devlopman;
Letansa detay pe fann so pikan.
Me pa bliye ki Gita pe dir nou:
Nanye pa ekziste san so kontrer.
Esansiel enn zour pou vinn lapousier;
Lerla detay ki pou ena bon gou.
Li boukou pli bon ki nou gard balans
Ant de kontrer pou anpes avalans.
21.09.21