Kan nou’nn tas dan lenpas, pa fer fos
Tap latet lor miray, pou grenn ros.
Si fer sa nou latet ki gagn bos!
Li bet sa, persiste, tourn anron;
Nou perdi nou letan kouma gon.
Pil anplas li pa enn solision.

Fer kouma Swami Vivekanann!
Ranz sime dan dezer, lasavann;
Tras nouvo santie pou sort dan bwa;
Zwenn lezot ki pe viv mem traka.

Pa ena de Bondie. Zis Ennsel!
Li partou, Li konn Tou, konpran tou.
Nou osi apel Li Zezikri,
Lespri Sen ki pran form enn imen.

26.10.21
 

Kan lezel kase ek elis anpann
Marsandiz gayar vit-vit vinn bien rann;
Avion-kargo pa kapav desir ler;
Bato-kargo pa kapav fouy lamer.
Diri ek dible boude dan grenie;
Tisert par balo res dan latelie;
Vit-vit letazer dan bann magazen
Get kliyan kouma bann zako sagren.

Bann pie friyapen ti gayar lontan;
Pie maniok ek may ti mari frengan;
Gardmanze lokal ti nouri zanfan
Avan ki roupi desid otreman.

Aster oblize fer kouma avan.
Letansa zanfan finn tas dan koutvan.

25.10.21