Ti’ena enn ti lil kot bann pie ebenn
Lor later fertil ek pie mangliye
Dan lamer tirkwaz ti nouri lavi.
Dodo pa ti per depoz so dizef
Lor later parski pa ti’ena lera,
Pa ti’ena mangous ki pou fer dega.

Enn aswar trazik, maler rant ansenn.
Tou bann pie tonbe pou gagn ranplase
E fer lamone rant dan kof garni.
Nouvo zanimo ek plant deklar sef;
Partou kot pase troupo bachara,
Veritab fatra, koumans fann kaka.

Zordi nou ti lil li dan gran lapenn;
Lete vinn liver; liver vinn lete;
Manze pa ena pou nouri fami.
Nouvo zenerasion sef nef ki bef
Pe fouy dan disab pou tir makacha
Ki kapav plen tenk dirizan malfra.

03.11.21
 

Pou Loga, Gerard, Saskia, Sam, Anushka, Zaynah, Taz, Yann ek Rachel
SELFISH OR SELFLESS LOVE?

Li fasil tom dan piez kan nou kwar
Ki bizen swazir ant lamour fay
Ki zis pran ek lamour partaze.
Lergete nou bizen toulede
Si nou pa ole sap dan karay
Pou fini dan dife marenwar.
Lavi li bien bizen linite
De kontrer pou kapav diboute.

Lamour ki pran, pran, pran san done
Li lamour egois bachara.
Me lamour zenere ki pa’le aksepte
Lamour ki lezot pe partaze,
Li osi danzere ki lotla
Parski li ‘si pa ekilibre.

Si nou’le bien reysi nou lavi
Bizen enn bon melanz de lamour:
Lamour ki nou done ek lamour
Ki konn pran san ekzazerasion.

Si to pa kontan twa, pa kapav
To kontan to prosen, ni Bondie.
Si to tro kontan twa, mem zafer.

31.10.21