Tex sours: Version Shri Purohit Swami – forma PDF; internet.
ARJUNA SO MORAL PA BON
NARATER (ENN LAVWA FAM): Lerwa Dhritarashtra dimann Sanjaya, “Sanjaya dir mwa ki ti arive laba dan sandbatay eroik ek istorik Kurukshetra kot mo pep ti mobilize pou dres bann Pandava?” Sanjaya reponn, ” Kan Prens Duryodhana ti trouv larme Pandava rekta lor baz, li ti al direk kot so profeser Guru Drona. Ala seki li ti dir li:
PRENS DURYODHANA: ” O Gran Lespri! Get sa larme pwisan Pandava la sou lidersip garso Lerwa Drupada, ou disip saz.
Dan sa larme la ena gran ero ek gran-gran arse; gerye osi kouraze ki Arjuna ek Bheema, Yuyudhana, Virata ek Drupada; zot tou bann gran solda renome;
Dhrishtaketu, Chekitan, Vayan Lerwa Benares, Purujit, Kuntibhoja, Shaibya – pli for ki boukou;
Yudhamanyu, Uttamouja, Soubhadra ek bann garson Droupadi, bann dimoun gran repitasion.
Aster get tousa bann kapitenn ki mars ar nou, O gran lider spiritiel, pli gran ki tou. Samem bann dirizan mo larme. Les mo donn ou zot nom toutswit.
Ou, oumem nimero 1; apre ena Bheeshma, Karna, Kripa, bann mahasolda; Ashwaththama, Vikarna ek garson Somadhatta;
Ek enn ta ankor ki pa kil parad e ki pare pou donn zot lavi pou mwa; zot tou bien arme e lager pa fer zot per.
Me nou larme paret pli feb malgre ki li dirize par Bheeshma e zot larme paret pli for malgre ki li dirize par Bheema.
Ala lord ki mo done: tou solda dres latet, tini ferm batayon par batayon; bann zeneral pran pozision de kote Bheeshma.”
NARATER (ENN LAVWA FAM):
Lerla koumadir pou remont so moral brav Granper Bheeshma, pli vie dan klan Kuru, ti soufle dan so kontch ziska ki son ki sorti ti kouma rizisman enn lion araze.
E san atann tou bann kontch, tanbour, tronpet ek bigoul ti larg enn rafal tapaz kouma loraz.
Lerla bien kale dan zot gran saryo lager, rise par seval blan, Senier Krishna ek Arjuna ti soufle dan zot koki beni.
Senier Krishna ti soufle so Pannchajannya e Arjuna so Devadata, brav Bheema soufle so koki renome, Poundra.
Lerwa Dharmaraja, garson Kunti, soufle Ananntavijaya, Nakula so Sougosh ek Sahadeo so Manipoushpaka.
Mahalerwa Benares, gran arse, Shikandi, gran solda, Dhrishtayumna, Virata ek Satyaki ki pa konn defet,
Drupada, bann garson Droupadi ek Soubhadra, sa gran gerye la, soufle dan zot koki kontch.
Enn gran tourbiyon tapaz ti desir leker bann garson Dhritarashtra e so eko ti fer lesiel ek later tranble.
Ler Arjuna ki ti pe sarye pavyon Hanuman ti trouv bann garson Dhritarashtra pare pou lager lor sandbatay
Li ti lev so ark e ti dir Senier Krishna:
ARJUNA: O pwisans ki pa konn defet! Bondie Later! Rann enn servis met mo saryo ant sa de larme la
Pou mo kapav obzerv bann ki dan mo kan ek bann ki kont mwa;
Pou mo yam bien sa bann degoutan ki pe mars ar bann garson malang Dhritarashtra.
NARATER (ENN LAVWA FAM): Senier Krishna ti ekout lapariyer Arjuna. Li ti plas so saryo mazik kare-kare zis omilie ant sa de larme ennmi la,
Kot li kapav trouv tou bann dirizan sou direksion Bheesma ek Drona. Senier Krishna dir: ” O Arjuna! get laba tou bann fami kuru.”
Ki Arjuna ti trouve? Papa, granpapa, tonton, kouzen, garson, tizanfan-garson, profeser, kamarad;
Boper, bienfeter toulede kote. Arjuna ti fixe so lizie lor so prop disan, lor so prop fami toulede kote.
So leker boulverse ar sagren ek pitie. Parol tris sorti dan so labous.
ARJUNA: Ayo Bondie! Ler mo trouv mo prop dimoun, mo prop disan swaf disan so prosen,
Mo lipie vinn feb e mo lagorz amare, mo lekor tranble e mo seve dibout drwat.
Mo ark Ganndiva sap dan mo lame, tonbe e mo lekor net gagn lafiev. Enposib res anplas parski mo lespri dan konfizion.
Lagign, lagign, move lagign! Ki debon kapav sorti dan masak mo prop dimoun lor sandbatay?
Senier, mo pa’le laviktwar, mo pa’le rwayom, mo pa’le okenn plezir. Ki pou fer ar tousa
Kan dimoun ki mo plis kontan pe dibout la e zot fite pou sakrifie tou, mem zot lavi?
Get zot! Mo prop profeser, papa, granpapa, zanfan, tizanfan, tonton, boper, bofrer. Mo prop fami dekote.
Zame mo pou touy zot! Mempa pou trwa rwayom lao. Aster mo kapav masakre mo prop disan pou enn bout later? Prefer mwa ki mor!
Senier! Ki profi kapav tire dan lamor bann garson Dhritarashtra? Pese sa, touy sa bann pov dimoun dan pens, dan dezespwar.
Nou devwar se fer travay nob, pa tir disan nou prop fami. Ki boner kapav ena dan asasina nou prop fami?
Mo kone bann garson Dhritarashtra zot lizie bouse par gourmandiz; zot sitan aveg ki zot pou touy zot prop fami, avoy zot prop kamarad manze.
Me nou, nou lizie trouv kler. Eski li pa nou devwar anpes enn krim ki pou detrir nou fami net?
Dan destriksion nou fami ena destriksion nou tradision ek nou kiltir e kan nou perdi sa tou pou vir anbalao. Valer moral ek relizie pou fonn.
Kan sa arive nou bann fam pou gat nasion e pirte nou ras pou disparet.
Lespri vis pou polie nou disan e disan bann ki polie nou disan. Letansa nam nou anset pou trime dan soufrans parski pa pou ena servisdemor pou zot.
Dan destriksion nou fami e dan polision nou disan ena lamor kiltir, tradision ek pirte nou ras.
Bann saz finn dir nou Senier, kan enn dimoun perdi so valer, li perdi so nam.
Drol sa! Pou nou zwir plezir enn rwayom nou dispoze touy nou konpatriyot e fer gran-gran pese.
Me si mo les bann garson Dhritarashtra touy mwa li pa pou meyer pou mo biennet?
NARATER (ENN LAVWA FAM): Apre sa omilie ant de larme, Arjuna ti larg so lekor, asiz dan saryo; zet so ark ek fles. Lasagren kas so leker.
Continue reading “DETRWA PAZ BAGAVAD GITA Tradiksion/Adaptasion par Dev Virahsawmy”
