©DEV VIRAHSAWMY AND ICJM
BANN PERSONAZ
Zeneral Makbef
Madam Makbef (fam Makbef)
Mazor Lipotik
Mazor Trankil
Mazor Kaskontour
Serzan Bouboul
Anbasader Yangkidola ek so bann konseye‚
Minis Zafer Etranzer Rouspoutik ek so bann konseye‚
Minis Boultang
Solda Boulbak
Marsan pistas
Marsan legim
Gaspar (mandian)
Polisie‚
Marsan sorbe‚
Marsan bred
Marsan naftalinn-lase-soulie‚
Enn garson 12 an
Enn madam
Enn misie‚
Enn vie bonom
Enn vie bonfam
1er planter
2em planter
3em planter
Bann solda
Bann dimoun dan plas piblik
Bann minis silansie‚
Enn dimoun dan lodians
Sooklall
AK 1
Omilie‚ lasenn ena enn fotey imans dan form enn tronn ki lor enn platform. Ler rido leve Sooklall, domestik dan pale prezidansiel, enn plimo dan lame, pe souy
lapousier lor fotey la. Li enn zom anviron karant-an e li paret bien frengan. So moustas epe, so long seve bien kwafe, so “overall” blan donn li enn laparans distenge. Dan plas plimo, si ti ena enn stetoskop dan so lame li ti pou pas fasilman pou enn dokter. Li paret enn karakter bien ge, enpe foutan. Li kontinie‚ pas plimo, tik enn kou, tir enn sifon depi dan so pos, kras lezerman lor enn lebra fotey la, pas sifon la, kil enpe fer enn sign koumadir li satisfe, re-al ver fotey la, teste so fon, asize, kas enn poz rwayal. Li imit enn lerwa ki pe dres so kouronn, fer bann zes otoriter koumadir enn lerwa ki pe donn lord. Lerla so figir sanze, li paret trakase, li get agos-adrwat, adrwat-agos koumadir ena enn pake dimoun ki pe fons lor li pou touy li. Li fer bann zes koumadir li pe defann limem; koumadir kikenn finn pik enn kouto dan so vant. Li fer koumadir dan douler li pe mor, parey kouma akter dan fim. Li sap lor so fotey li tonbe. Li leve, get fotey la, riy enn gran kout foutan, mars ver lodians.
SOOKLALL: E bann manm! Zot finn vinn get sa sinema la – extra sinema mo dir zot. Mo sir zot pou amize get bann fouka – mwa parmi – sote , pile, kriye, sante, plore, ets. ets.
ENN DIMOUN DAN LODIANS: Eta figir! Twa ki twa?
SOOKLALL: Mwa mo serviter lwayal sa mazeste.
(Li bes so latet, koumadir li pe fer lapriyer divan enn tom)
Que Dieu ramasse son âme! Me kouma sa mazeste finn kaykoun, zordi mo serviter lwayal Misie Prezidan, Zeneral Makbef.
(Gran tapaz deor. Tann lafoul pe kriye: “Viv Zeneral Makbef! Viv Repiblik! Longue vie au General! God save our Gracious President!”)
SOOKLALL:Zot tande zot mem? Lepep kontan so prezidan… parey kouma lontan li ti kontan so lerwa. Dir ou extra! Tou dimoun dan lalias. Prezidan finn donn tou dimoun enn zour konze, bann zanfan lekol finn gagn gato ek limonad. Sa ki apel enn bon dirizan. Ki zot panse? Korek? Pa korek?
ENN DIMOUNN DAN LODIANS: Eta aret to palab. Zot pou koumans sa natak la, zot pa pou koumanse?
SOOKLALL: Pa prese manm. Mo kone ou kontan manz pistas get sinema… Avan sef la vini, avan lekours large, mo ena enn ti zafer pou dir zot. Enn sekre. Kouma mo ti dir zot talerla, lerwa finn kaykoun, me ki manier mo pa kone… personn pa kone, anfen mo kwar mo kone me pa kapav dir zot. Tro sibversif. Mo sir zot finn fini devine… Wi, samem ki finn arive… Me bizen kwar kominike ofisiel. Dayer lerwa pa finn fer enn testaman? Li pa finn dir ki li finn degout so lavi? Li pa finn dir ki monarsi enn zafer depase? Ki bizen enn repiblik? Ki so eritie se Kapitenn Makbef, pardon Zeneral Makbef, so nouvo tit? bizen fer konfians kominike ofisiel… Sa mazeste ti enn bon dimoun me ki pou fer, lamor ekzis. Apre sa listwar avanse! Ler repiblik finn arive, bizen aksepte. Bann lopozision touzour mem koze, zame zot satisfe, pe dir ki finn ena enn koudeta, enn koudefors, enn revolision-de-pale‚ ek sipa ki ete. Mwa mo pa kwar tou sa. Zistwar sa. Bizen aksepte kominike ofisiel. Sa volonte Bondie sa!
(Gran tapaz la finn raprose.) Bon mo bizen sove. Bannla la pre pou vini. Salam! Pli tar nou va zwenn! (Li al dibout dan kwen).
(Zeneral Makbef dan so iniform militer rantre par laport agos. Li bien smart. Lor so ches ena toutsort kalite meday. Deryer li, bann lezot manm konsey revolision swiv li dan lord ek disiplinn kouma dan parad).