Mo babam, mo papa so mama,
Sak fwa li gagn enn sok, agase,
Gagn sirpriz, pa’le kwar so lizie,
Larg so emosion ar “Olamma!”.
Tradision kas pikan? Olamma!
Enn menaz dan dife? Olamma!
Zanfan pe gat nasion? Olamma!
Siklonn pe menase? Olamma!

Si li ti la zordi, deroulman
Ti pou plen so lespri ar traka;
Ti pou fer li perdi so zizman.
Pie ki pa respekte bann sezon?
Zanfan ki pa respe zot paran?
Ki pou fer? “Olamma! Olamma!”

Olamma: Expresion Telegou ki vedir “Ayo mama!” ousa “Ayo Bondie!” (Sanass Virah Sawmy)

Nou priye Soma e nou bwar soma
Me kan Mamon dir ki nou bizen fer,
Soma vinn tabou; larak ek taba
Pran plas kanabis dan tou minister.
Depi plis ki senkant an sa de la
Pe nouri lopital ek simitier
Mem ki nou kone ki gran frer ganja,
Anna SeBeDe, amenn lalimier.

Kifer nou prefer nouri konfizion,
Fer pa bon vinn bon, fer bon vinn pa bon?
Parski se Mamon ki tini baton.
Gran Kaptann Mamon ena so mision:
Fer so bann chokrra bwar wiski-glason
Letan ti poson mwazi dan prizon.

02.10.21