Poezi / Poetry – Page 8 – DEV VIRAHSAWMY/BOUKIE BANANE

NAM/ATMA/ÂME/SOUL

©Institut Cardinal Jean Margeot, 1 lari Celicourt Antelme, Rozil, Moris
POU TOU ARTIS KI ENTERESE
Bann artis ki anvi servi sa tex la, bizen dimann permision ICJM ki propriyeter kopirayt. Mo pa kwar li pou dimann enn fiz me si zot donn enn kontribision, sa kapav ed li fer so travay ledikasion.

OÙ IRAS-TU?

Biento-biento to pou kit mwa deryer,
Enn ti plot later san okenn valer.
To pou’al donn nesans nouvo kreatir
Pa kone kotsa dan lekor fitir.

Kot to pou ale mo nam?
Where will you go my soul?
Où iras-tu mon âme?
Dan lekor enn sen ousa enn bourik?
Lekor kreatir enn lot liniver?
Lekor Mahatma ousa satanik?
Ousa to pou fonn dan Nam Kreater?

Nouvo plot later li pou lor enn lil?
Ousa losean? Ousa kontinan?
Dan krater volkan ousa Vatican?
Dan lavi fasil ousa difisil?

Kot to pou ale mo nam?
Where will you go my soul?
Où iras-tu mon âme?
Dan lekor enn sen ousa enn bourik?
Lekor kreatir enn lot liniver?
Lekor Mahatma ousa satanik?
Ousa to pou fonn dan Nam Kreater?

Nam vakabon dan lespas enfini
Ki rod experyans dan lot galaxi?
Nam explorater zame satisfe
Ki dan vwayaze dekouver bienfe?

Kot to pou ale mo nam?
Where will you go my soul?
Où iras-tu mon âme?
Dan lekor enn sen ousa enn bourik?
Lekor kreatir enn lot liniver?
Lekor Mahatma ousa satanik?
Ousa to pou fonn dan Nam Kreater?

Ayo mo ti nam, kan to zwenn Gran Nam,
Dir Li pa kone ki ti’ena deryer,
Ki pou’ena divan me Dev ti senser
Mem dan so erer. Li dir twa salam!

Kot to pou ale mo nam?
Where will you go my soul?
Où iras-tu mon âme?
Dan lekor enn sen ousa enn bourik?
Lekor kreatir enn lot liniver?
Lekor Mahatma ousa satanik?
Ousa to pou fonn dan Nam Kreater?

04.05.2020

©Institut Cardinal Jean Margeot, 1 lari Celicourt Antelme, Rozil, Moris

BASILIC SACRÉ OU PLANTE TULSI

Kan mo ti zanfan, gran dimoun isi
Ti dir mwa, garson, okip pie toulsi.
Mo ti tro fatra pou dir zot mersi.
Mo ti prefer fler sorti lot pei
Ki fer fezer dan ansiklopedi.
Aster mo konpran valer pie toulsi.

Toulezour, san fot, mo al okip li;
Donn li nouritir; protez so lavi;
Anpes bann verminn vinn fann lapipi.
My holy basil, ma plante tulsi
Parfim mo lakour, mo lakaz beni,
Nouri mo lekor, netway mo lespri.
Basilic sacré! Zoli pie toulsi!

Mo zanfan zot fer kouma mwa zordi
Parski zot kone toulsi garanti
Enn bon lekilib ant lekor-lespri,
Ant natir-kiltir, ant yer ek zordi.
Nou bann pie toulsi rekta pe nouri
Lekor ek lespri, konbat santi pi.

Lang ki nou servi pou dir nou lavi,
Pou dir nou lespri, kouma pie toulsi
Li ranz nou desten, amenn armoni,
Efas ignorans, konbat partipri,
Amenn dinite, grandi nou lespri,
E prepar sime pou vre paradi.

03.05.20

Contact

INSTITUT CARDINAL JEAN MARGEOT:
1, Celicourt Antelme Street, Rose Hill, Mauritius;

Private and scholarly use is free of charge. For permission to use the material commercially please contact:

INSTITUT CARDINAL JEAN MARGEOT, 1, Celicourt Antelme Street, Rose Hill, Mauritius;
specifying the intended use.

ROYALTIES:
When an educational institution wants to use © material for curricular and extracurricular activities, it should be free of charge BUT source should be acknowledged;
When youth clubs want to use © material for special cultural and artistic non-profit making events, it should be free of charge BUT source should be acknowledged;
If school textbook writers want to use © material, they should negotiate with ICJM and source should be acknowledged;
If composers and singers want to use © material they should negotiate with ICJM and source should be acknowledged;
If publishers want to publish © material they should negotiate with ICJM and source should be acknowledged;
If film and/or stage producers and directors want to use © material they should negotiate with ICJM and source should be acknowledged.

Category: Poezi / Poetry

KOT TO POU ALE? / WHERE WILL YOU GO?

MO PIE TOULSI/MY HOLY BASIL