POU TAZIOU, YANNDOU EK RASHOU
©DEV VIRAHSAWMY AND ICJM
ENTRODIKSION
Mo kontan dir mo pe galoup dernie ferlong. Anverite depi enpe letan mo finn aret galoupe ousa joge. Souvan mo pe zis trenn-trenn mo lipie ler mo pe mont promenad Rolan Arman pou al Rozil parey kouma masinn nimero 17 lepok ti ena tren. Malgre sa mo kontan servi expresion ‘galoup dernie ferlong’ kikfwa parski li fer mwa rapel letan lontan kan mo fami ti amenn mwa Sannmars pou get lekours Medenn e mo ti tann mo papa ek tonton dekrir seval favori so performans dan dernie ferlong. Mem si parfwa douler pens mwa, mo kontan ki mo pe ‘galoup’ dernie ferlong bien lantman. Sa pe donn mwa plis letan pou ekrir mo dayri.
Kifer mo pe koumans sa dayri la? Pa parski mo ena kiksoz enportan pou dir. Mo finn fini dir seki mo ti ena pou dir dan poem, lartik, tizistwar, pies teat, novela, roman, tradiksion tex literer sekiler ek relizie. Sel fason mo ena pou monitor seki pe pase dan mo latet ek mo leker ler mo pe ‘galoup dernie ferlong’.
Se osi enn fason spesial dir mo 3 tizanfan (Taziou, Yanndou ek Rashou) ki mo ete. Se mo fason dir zot komie zot enportan pou mwa. Komie mo sagren pou kit zot dan enn lemonn kot lavi pou vinn plizanpli difisil akoz global warming ek so sanzman klimatik; akoz kipidite, egoism bann ki kontrol lekonomi; akoz nou planet ki bien malad parski olie okip so biennet nou viol li pou tir tou zi.
Mo espere ki mo Taziou, Yanndou ek Rashou pou, malgre tou, fer tou pou sem lavi ek kiltiv boner dan zarden Bondie.
Dev Virahsawmy
23.09.2014
Continue reading “DAYRI DERNIE FERLONG”
