VER ANPLENNER 6

ENN PESER-LABOURER
Enn peser-labourer dan vilaz Samarel,
Dan gri-gri gramaten kan bann fe dan lesiel
Finn kasiet zot palet, ramas kot so lafnet
Enn zwazo plim mouye ki pe mor lamor bet.

Vit-vit li souy li sek, anvlop li ar lenz so,
Ar kouyer fer li bwar detrwa gorze dilo
Pou sov lavi zwazo lesiel-later-lamer
Ki finn grandi lao lor montagn set kouler.

Ler tanto arive ar labrim ti lapli
Zwazo mengi-mengi pa tann lapo kabri;
Dan enn kwen so pagne li pe fixe dan vid,
Respire pa fasil kan lavi finn lasid.

Nou peser-labourer pas lanwit pou vey li,
Konsol li, soulaz li, redonn li gou lavi.
Ler gramaten vini so lizie ferm tousel,
Dan enn rev fantastik li pe bat so lezel.

Dan lesiel Samarel; dan lebra so zwazo
Lor enn vag Nirrvana zot pe bengn dan dilo
Kolorye ar penso bann zepis parfime…
Ler so somey kase zwazo finn anvole.

Dan so plas enn prenses lor enn tronn kler-de-linn,
Bote lebenn dan enn sari laswa-de-sinn
Pe sant lamour. Enn gran roulman lapo kabri
Anvlop so nam ar sawal nouvo melodi.

Bann zwazo Samarel dan lesiel set kouler
Finn aprann so sante; bann pwason dan lamer,
Tou bann pie lor montagn anker pe sant ansam.
Nouvo poem kram-kram aster pe donn lagam.


A FISHER-FARMER
A fisher-farmer in Samarel
In the morning mist when heavenly spirits
Put away their palettes, found on his window sill
A drenched bird facing certain death.

He quickly dried it, wrapped it in warm stuff;
With a spoon helped it drink some water
To save the bird of sky, sea and land
Which grew up on the rainbow mountain.

When dusk came with mist and rain
The frail bird could not hear the drum beat.
In a corner of the basket it stared with empty eyes
And could hardly breathe.

Our fisher-farmer nursed it all night;
Gave it comfort and care to face agony.
As day began to dawn he fell asleep
And dreamt he was flying.

In Samarel sky, in his bird’s arms,
On Nirvana wave they swam
In fragrant spicy coloured water …
When he woke up,the bird was gone.

Before him was a princess on a moonbeam throne,
Ebony black beauty in Chinese silk saree
Singing love. Ravanne rolling beat
Lifted his soul with new mellow melody.

Samarel birds in seven colour sky
Have learnt the song; fish in the sea,
Trees on mountains sing it in unison.
New crispy verse now fills rhyme with rhythm. 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.