©DEV VIRAHSAWMY AND ICJM

Li posed kilomet kare lamer
Par milion me kifer so bann peser
Ler bato savire zot mor nwaye?
Zanfan dilo dan dilo zwenn tase?
Kreatir maritim pa konn naze?
Pei mirak sa? Ousa pei ak?

Li posed later fertil kot Bondie
Fer tou pouse me olie plant manze
Li plant goudron ek beton pou donn jos
Oustad Roupaya sort dan tou lasos
Pourvi ena chiling-chiling dan pos.
Pei mirak sa? Ousa pei ak?

So demokrasi zoli kous verni
Fer aveg trouv kler me tansion, Lerni,
Rod demokrasi dan biye de mil!
Rod enn ti seke, rod debrouy difil
Dan salon Detrwa! Difidifisil!
Pei mirak sa? Ousa pei ak?

Li posed boukou, boukou-boukou lang
Tou kalite fer rozet ar lalang;
Li posed boukou-boukou lapriyer
Ki tou peroke finn aprann par ker;
Ritiel frengan, kalite lor kouler.
Pei mirak sa? Ousa pei ak?

Li posed meyer akter triyanger;
Meyer kouyoner, meyer mardayer;
Meyer bater bis ek bater lakol;
Meyer lekol, lalkol, patol, lazol.
He bayo! Mo pa pe koz parabol!
Pei mirak sa? Ousa pei ak?

08.06.2017

©DEV VIRAHSAWMY AND ICJM

Enn fwa Gouna ti rakont mwa zistwar Zako Grolizie-Tivant. Li ti rant dan enn karo kann, kas enn kann. Olie manz li, li ti desid pou plen tenk. Li ti kas enn, ti met li anba so lebra, kas enn lot, met li anba so lebra, enn trwaziem, katriyem, diziem, santiem. Ler li ti retourn lor so pie, ti ena enn sel anba so lebra, enn baton kann mengi-mengi. Rezilta, Gouna ti dir mwa: Kaka sat san disel.

Nou tou dan pei Moris nou kouma sa zako la? Zako Grolizie-Tivant?

… Fos sa!

Nou ena enn lang. Olie aprann lir ek ekrir li e lor baz sa premie lang la, aprann enn deziem e pli tar, si nou kapav, aprann enn trwaziem, ki nou fer? Nou dir ki nou konn premie lang la, donk pa neseser aprann lir ek ekrir li. Savedir nou kapav ek bizen aprann boukou-boukou lang kouma English, Français, Esperanto ek Volapük. Grolizie-Tivant. Rezilta: Kaka sat san disel. Olie vinn trileng, boukouleng nou vinn zeroleng e, si nou ena enpe sans, semileng. E lorla nou gagn so bonis: zeroletre e, si nou ena enpe sans, semiletre.

… Pa rakont zistwar do ta. Koz koze ki bizen koze!

Continue reading “GROLIZIE-TIVANT”